2 பேதுரு 2

2 ¹ஜனங்களுக்குள்ளே கள்ளத்தீர்க்கதரிசிகள் எழும்பினதுபோல, உங்களுக்குள்ளும் கள்ளப்போதகர்கள் எழும்புவார்கள். அவர்கள் அழிவுக்கேதுவான வேதப்புரட்டுகளை இரகசியமாய் உட்புகுத்தி, தங்களைக் கிரயத்துக்குக் கொண்ட ஆண்டவரையும் மறுதலித்து, தங்கள்மேல் சீக்கிரமான அழிவை வருவித்துக்கொள்வார்கள். ^a a v1 “தங்களைக் கிரயத்துக்குக் கொண்ட ஆண்டவர்” என்பவர் இயேசுவே; அவர் தம்முடைய சொந்த இரத்தத்தினால் அவர்களுடைய விடுதலைக்குக் கிரயம் செலுத்தினார் — இதனால் அவரை அவர்கள் மறுதலிப்பது இன்னும் அதிக துக்கமானது. ²அநேகர் அவர்களுடைய காமவிகாரங்களைப் பின்பற்றுவார்கள்; அவர்கள் நிமித்தம் சத்தியத்தின் வழி தூஷிக்கப்படும். ³பொருளாசையினால் அவர்கள் கற்பனையான வார்த்தைகளைக்கொண்டு உங்களைச் சுரண்டுவார்கள். வெகுகாலத்துக்குமுன்பே தீர்மானிக்கப்பட்ட அவர்களுடைய நியாயத்தீர்ப்பு தாமதிக்காது; அவர்களுடைய அழிவு உறங்குகிறதில்லை.

⁴ஏனெனில், பாவஞ்செய்த தூதர்களை எங்கள் பிதா தப்பவிடாமல், இருளின் விலங்குகளால் கட்டி, மிகவும் ஆழமான இருளின் படுகுழியிலே தள்ளி, நியாயத்தீர்ப்புக்கென்று காத்துவைத்தார்; ^b b v4 தார்த்தரோஸ் என்பது விழுந்துபோன தூதர்களை அடைத்துவைக்கும் இடம் — நரகத்தைக் குறிக்கும் வழக்கமான சொல்லிலிருந்து வேறுபட்ட ஒரு சொல்; கலகஞ்செய்த ஆவிகள் நியாயத்தீர்ப்புக்குக் காத்திருக்கும் சிறைச்சாலையை இது பெயரிடுகிறது. ⁵பூர்வ உலகத்தையும் அவர் தப்பவிடாமல், துன்மார்க்க உலகத்தின்மேல் ஜலப்பிரளயத்தை வரப்பண்ணினபோது, நீதியைப் பிரசங்கித்தவனாகிய நோவாவை மற்ற ஏழுபேரோடே காப்பாற்றினார்; ⁶அன்றியும், சோதோம் கொமோரா பட்டணங்களைச் சாம்பலாக்கி, துன்மார்க்கருக்கு வருங்காலத்தைப் பற்றிய ஒரு உதாரணமாக ஆக்கி, அவைகளை ஆக்கினைக்குள்ளாகத் தீர்த்தார்; ⁷அக்கிரமக்காரருடைய வெட்கங்கெட்ட நடக்கையினால் வருத்தமடைந்திருந்த நீதிமானாகிய லோத்தையும் அவர் தப்புவித்தார். ⁸அந்த நீதிமான் அவர்களுக்குள்ளே வாசம்பண்ணியிருந்து, தான் கண்டும் கேட்டும் வந்த அக்கிரமச் செய்கைகளினால் தன் நீதியுள்ள ஆத்துமாவிலே நாளுக்குநாள் வேதனைப்பட்டான். ⁹இப்படியிருக்க, தேவபக்தியுள்ளவர்களைச் சோதனைகளிலிருந்து விடுவிக்கவும், துன்மார்க்கரை நியாயத்தீர்ப்பு நாள்வரைக்கும் தண்டனையின்கீழ் வைத்திருக்கவும் எங்கள் பிதா அறிந்திருக்கிறார். ¹⁰விசேஷமாய், மாம்சத்தின் கெட்ட இச்சைகளைப் பின்பற்றி, அதிகாரத்தை அசட்டைபண்ணுகிறவர்களையே அப்படிச் செய்வார்; இவர்கள் துணிகரமுள்ளவர்களும், அகந்தையுள்ளவர்களும், மகிமையுள்ளவைகளைத் தூஷிக்கப் பயப்படாதவர்களுமாயிருக்கிறார்கள். ¹¹பலத்திலும் வல்லமையிலும் அதிகமான தூதர்களோ, எங்கள் பிதாவின் சந்நிதியில் அவர்களுக்கு விரோதமாய்த் தூஷணமான நியாயத்தீர்ப்பைக் கொண்டுவருகிறதில்லை. ¹²இவர்களோ, பிடிபட்டு அழிக்கப்படும்பொருட்டு சுபாவப்படி பிறந்த புத்தியில்லாத மிருகங்களைப்போல, தாங்கள் அறியாதவைகளைத் தூஷித்து, தங்கள் அழிவிலே அழிந்துபோய், ¹³அநியாயஞ்செய்ததற்குக் கூலியாக அநியாயத்தை அடைவார்கள். பட்டப்பகலில் களியாட்டமிருப்பதைச் சந்தோஷமென்று எண்ணுகிறார்கள். இவர்கள் உங்களோடே விருந்துண்ணும்போது தங்கள் வஞ்சகங்களில் களியாட்டம்பண்ணுகிற மாசுகளும் கறைகளுமாயிருக்கிறார்கள். ¹⁴அவர்களுடைய கண்கள் விபசாரத்தினால் நிறைந்தவைகள், பாவஞ்செய்வதை நிறுத்தாதவைகள்; நிலையற்ற ஆத்துமாக்களைத் தந்திரமாய் இழுக்கிறார்கள்; அவர்கள் இருதயம் பொருளாசையிலே பழக்கப்பட்டது; சாபத்தின் பிள்ளைகள்! ¹⁵செம்மையான வழியைவிட்டு அவர்கள் வழிதப்பி, அநியாயத்தின் கூலியை விரும்பின பேயோரின் குமாரனாகிய பிலேயாமுடைய வழியைப் பின்பற்றிப்போனார்கள். ^c c v15 பிலேயாம் என்பவன் கூலிக்குப் பேசுகிற ஒரு தீர்க்கதரிசி; உண்மையைவிட பணத்தையே நாடி, தன் சொந்தக் கழுதையினால் கடிந்துகொள்ளப்பட்டான் — அவனுடைய முழு வரலாறும் எண்ணாகமம் 22–24-ல் உள்ளது. ¹⁶ஆனாலும் அவன் தன் அக்கிரமத்தினிமித்தம் கடிந்துகொள்ளப்பட்டான்: பேசாத கழுதை மனிதனுடைய குரலில் பேசி, அந்தத் தீர்க்கதரிசியின் பைத்தியத்தைத் தடுத்தது.

¹⁷இவர்கள் தண்ணீரில்லாத ஊற்றுகள், பெருங்காற்றினால் அடித்துச்செல்லப்படுகிற மேகங்கள்; இவர்களுக்கு காரிருள் காத்துவைக்கப்பட்டிருக்கிறது. ¹⁸வஞ்சகத்தில் நடக்கிறவர்களிடமிருந்து அரிதாய்த் தப்பியவர்களை, இவர்கள் வீண்பெருமையான வார்த்தைகளைப் பேசி, மாம்சத்தின் இச்சைகளினாலும் காமவிகாரங்களினாலும் தந்திரமாய் இழுக்கிறார்கள். ¹⁹தாங்களே கேட்டுக்கு அடிமைகளாயிருந்தும், அவர்களுக்கு விடுதலையை வாக்குத்தத்தம்பண்ணுகிறார்கள்; எதனால் ஒருவன் ஜெயிக்கப்படுகிறானோ அதற்கே அவன் அடிமைப்படுகிறான்.

²⁰நம்முடைய கர்த்தரும் இரட்சகருமாகிய இயேசுகிறிஸ்துவை அறிந்ததினாலே உலகத்தின் அசுத்தங்களுக்குத் தப்பினவர்கள் மறுபடியும் அவைகளில் சிக்கிக்கொண்டு ஜெயிக்கப்பட்டால், அவர்களுடைய முடிவு அவர்களுடைய துவக்கத்தைப்பார்க்கிலும் கேடானதாயிருக்கும். ²¹அவர்கள் நீதியின் வழியை அறிந்தபின்பு, தங்களுக்கு ஒப்புவிக்கப்பட்ட பரிசுத்த கற்பனையைவிட்டுத் திரும்புவதைப்பார்க்கிலும், அந்த வழியை அறியாதிருந்தார்களானால் அவர்களுக்கு நலமாயிருக்கும். ²²“நாய் தான் கக்கினதைத் தின்னும்படி திரும்பும்” என்றும், “கழுவப்பட்ட பன்றி சேற்றிலே புரளும்படி திரும்பும்” என்றும் சொல்லப்பட்ட உண்மையான பழமொழியின்படி அவர்களுக்குச் சம்பவித்தது.