2 இராஜாக்கள் 2

2 ¹எங்கள் பிதா எலியாவைச் சுழல்காற்றிலே பரலோகத்திற்கு எடுத்துக்கொள்ளப்போகிற வேளையில், எலியாவும் எலிசாவும் கில்காலைவிட்டுப் புறப்பட்டார்கள். ²எலியா எலிசாவை நோக்கி, “நீ தயவுசெய்து இங்கே இரு; எங்கள் பிதா என்னைப் பெத்தேலுக்கு அனுப்பியிருக்கிறார்” என்றான். அதற்கு எலிசா, “எங்கள் பிதாவின் ஜீவனைக்கொண்டும், உம்முடைய ஜீவனைக்கொண்டும் சொல்லுகிறேன், நான் உம்மைவிட்டுப் பிரியேன்” என்றான். அப்படியே அவர்கள் பெத்தேலுக்குப் போனார்கள்.

³பெத்தேலிலிருந்த தீர்க்கதரிசிகளின் கூட்டத்தார் எலிசாவினிடத்தில் வெளியே வந்து, “எங்கள் பிதா இன்று உன் எஜமானை உன் தலைக்குமேலிருந்து எடுத்துக்கொள்ளப்போகிறதை நீ அறிவாயா?” என்று கேட்டார்கள். அதற்கு அவன், “ஆம், அறிவேன்; நீங்கள் மௌனமாயிருங்கள்” என்றான்.

⁴எலியா அவனை நோக்கி, “எலிசா, நீ தயவுசெய்து இங்கே இரு; எங்கள் பிதா என்னை எரிகோவுக்கு அனுப்பியிருக்கிறார்” என்றான். அதற்கு அவன், “எங்கள் பிதாவின் ஜீவனைக்கொண்டும், உம்முடைய ஜீவனைக்கொண்டும் சொல்லுகிறேன், நான் உம்மைவிட்டுப் பிரியேன்” என்றான். அப்படியே அவர்கள் எரிகோவுக்குப் போனார்கள்.

⁵எரிகோவிலிருந்த தீர்க்கதரிசிகளின் கூட்டத்தார் எலிசாவினிடத்தில் வந்து, “எங்கள் பிதா இன்று உன் எஜமானை உன்னிடத்திலிருந்து எடுத்துக்கொள்ளப்போகிறதை நீ அறிவாயா?” என்று கேட்டார்கள். அதற்கு அவன், “ஆம், அறிவேன்; நீங்கள் மௌனமாயிருங்கள்” என்றான்.

⁶எலியா அவனை நோக்கி, “நீ தயவுசெய்து இங்கே இரு; எங்கள் பிதா என்னை யோர்தானுக்கு அனுப்பியிருக்கிறார்” என்றான். அதற்கு அவன், “எங்கள் பிதாவின் ஜீவனைக்கொண்டும், உம்முடைய ஜீவனைக்கொண்டும் சொல்லுகிறேன், நான் உம்மைவிட்டுப் பிரியேன்” என்றான். அப்படியே அவ்விருவரும் நடந்துபோனார்கள்.

⁷தீர்க்கதரிசிகளின் கூட்டத்தாரில் ஐம்பதுபேர் போய், தூரத்திலே அவர்களுக்கு எதிராக நின்றார்கள்; அவ்விருவரும் யோர்தானண்டையில் நின்றார்கள். ⁸எலியா தன் சால்வையை எடுத்து, சுருட்டி, தண்ணீரை அடித்தான்; அது இருபக்கமாகப் பிரிந்தது; அவ்விருவரும் உலர்ந்த தரையின்மேல் கடந்துபோனார்கள். ⁹அவர்கள் கடந்துபோனபின், எலியா எலிசாவை நோக்கி, “நான் உன்னைவிட்டு எடுத்துக்கொள்ளப்படுமுன், நான் உனக்கு என்ன செய்யவேண்டும் என்று கேள்” என்றான். அதற்கு எலிசா, “உம்முடைய ஆவியின் இரட்டிப்பான பங்கு எனக்குக் கிடைக்கும்படி தயவுசெய்யும்” என்றான்.

¹⁰அதற்கு எலியா, “நீ கடினமான காரியத்தைக் கேட்டாய்; ஆகிலும், நான் உன்னைவிட்டு எடுத்துக்கொள்ளப்படுகிறதை நீ கண்டால், உனக்கு அப்படியாகும்; காணாவிட்டால், ஆகாது” என்றான்.

¹¹அவர்கள் பேசிக்கொண்டு நடந்துபோகையில், இதோ, அக்கினி இரதமும் அக்கினி குதிரைகளும் தோன்றி அவ்விருவரையும் பிரித்தன; எலியா சுழல்காற்றிலே பரலோகத்திற்கு ஏறிப்போனான். ¹²எலிசா அதைக்கண்டு, “என் தகப்பனே, என் தகப்பனே! இஸ்ரவேலின் இரதமே, அதின் குதிரைவீரரே!” என்று கூப்பிட்டான். பின்பு அவனை அவன் காணவில்லை. அப்பொழுது அவன் தன் வஸ்திரங்களைப் பிடித்து இரண்டாகக் கிழித்துப்போட்டான்.

¹³அவன் எலியாவின்மேலிருந்து விழுந்த சால்வையை எடுத்துக்கொண்டு, திரும்பிப்போய், யோர்தானின் கரையிலே நின்றான். ¹⁴அவன் எலியாவின்மேலிருந்து விழுந்த சால்வையை எடுத்து, தண்ணீரை அடித்து, “எலியாவின் தேவனாகிய எங்கள் பிதா எங்கே?” என்றான். அவன் தண்ணீரை அடித்தபோது, அது வலதுபுறமும் இடதுபுறமும் பிரிந்தது; எலிசா கடந்துபோனான்.

¹⁵எரிகோவிலே அவனுக்கு எதிரே இருந்த தீர்க்கதரிசிகள் அதைக்கண்டு, “எலியாவின் ஆவி எலிசாவின்மேல் தங்கியிருக்கிறது” என்று சொல்லி, அவனுக்கு எதிர்கொண்டுபோய், தரைமட்டும் அவனை வணங்கினார்கள். ¹⁶“இதோ, உம்முடைய அடியாரிடத்தில் ஐம்பது பலசாலிகள் இருக்கிறார்கள்; அவர்கள் போய் உம்முடைய எஜமானைத் தேடட்டும்; ஒருவேளை எங்கள் பிதாவின் ஆவி அவரை எடுத்து, ஏதோ ஒரு மலையிலாவது, ஏதோ ஒரு பள்ளத்தாக்கிலாவது போட்டிருக்கும்” என்றார்கள். அதற்கு எலிசா, “வேண்டாம், அனுப்பாதேயுங்கள்” என்றான்.

¹⁷அவர்கள் அவனை வெட்கப்படத்தக்கதாய் மிகவும் வருந்திக்கேட்டதினால், அவன், “அனுப்புங்கள்” என்றான். அப்பொழுது அவர்கள் ஐம்பதுபேரை அனுப்பினார்கள்; அவர்கள் மூன்றுநாள் தேடியும் அவனைக் காணவில்லை.

¹⁸எரிகோவிலே தங்கியிருந்த எலிசாவினிடத்தில் அவர்கள் திரும்பிவந்தபோது, அவன் அவர்களை நோக்கி, “போகாதேயுங்கள் என்று நான் உங்களுக்குச் சொல்லவில்லையா?” என்றான்.

பிதாவானவர் எரிகோவின் தண்ணீரைச் சொஸ்தமாக்குகிறார்

¹⁹அந்த ஊரார் எலிசாவை நோக்கி, “இதோ, எங்கள் ஆண்டவனே, நீர் காண்கிறபடி இந்தப் பட்டணத்தின் இருப்பிடம் நன்றாயிருக்கிறது; ஆனாலும் தண்ணீர் கெட்டதாயும், நிலம் பலனற்றதாயும் இருக்கிறது” என்றார்கள்.

²⁰அதற்கு அவன், “ஒரு புது பாத்திரத்தை என்னிடத்தில் கொண்டுவந்து, அதிலே உப்புப் போடுங்கள்” என்றான்; அவர்கள் அதை அவனிடத்தில் கொண்டுவந்தார்கள்.

²¹அவன் நீரூற்றண்டைக்குப் போய், அதிலே உப்பைப் போட்டு, “எங்கள் பிதா சொல்லுகிறது என்னவென்றால்: இந்தத் தண்ணீரை நான் சொஸ்தமாக்கினேன்; இனி இது மரணத்தையும் பலனற்ற தன்மையையும் உண்டாக்காது என்கிறார்” என்றான்.

²²எலிசா சொன்ன வார்த்தையின்படியே, அந்தத் தண்ணீர் இந்நாள்வரைக்கும் சுத்தமாயிருக்கிறது.

²³அவ்விடம்விட்டு எலிசா பெத்தேலுக்குப் போனான். அவன் வழியிலே நடந்துபோகையில், சிறு பிள்ளைகள் பட்டணத்திலிருந்து வந்து, “மொட்டைத்தலையா, ஏறிப்போ; மொட்டைத்தலையா, ஏறிப்போ” என்று அவனைப் பரியாசம்பண்ணினார்கள். ²⁴அவன் திரும்பி அவர்களைப் பார்த்து, எங்கள் பிதாவின் நாமத்திலே அவர்களைச் சபித்தான். அப்பொழுது காட்டிலிருந்து இரண்டு கரடிகள் வந்து, அந்தப் பிள்ளைகளில் நாற்பத்திரண்டுபேரைப் பீறிப்போட்டன. ²⁵பின்பு அவன் அவ்விடம்விட்டுக் கர்மேல் மலைக்குப் போய், அங்கேயிருந்து சமாரியாவுக்குத் திரும்பினான்.